Хуйлмалын цаасаар хийсэн цэцгийг ихэвчлэн бэлэг дурсгалын зориулалтаар ханын чимэглэл эсвэл мэндчилгээний картанд ашигладаг. Хуйлмалын цаас ашиглан хүзүүний зүүлт хийж үзээрэй гэж Жүли надад хэлсний дараагаар өөрт байсан хар-ногоон өнгийн копрон туузтай хослох цэцэг, цэцгийн дэлбээнүүдийг хуйлж, хооронд нь нааснаар хөөрхөн хүзүүний зүүлтний кулонтой боллоо.
Мэдээж та өөрийн дуртай өнгөөрөө хүссэн цэцгээ урлаж болно.
Хуйлмал цэцэгт:
- Хуйлмалын цаас (3 мм-ийн өргөнтэй бор, хар ногоон, шар)
- Хуйлагч багаж
- Цавуу (Elmer’s Craft Bond)
- DuraClear Ultra Matte лак
- Тойрог хэмжигч
Хүзүүний зүүлтэнд:
- Тууз (өөрийнхөө хүзүүний хэмжээгээр)
- Зүүлтний түгжээ
- Зүүлтний холбогч цагирагууд
- Урлалын бахь
Хуйлмалын цаас маань уртаараа 57 см бөгөөд нэг цэцгийн дэлбээ хийхэд хэтэрхий уртдах тул цаасаа 2 хувааж хийсэн. Хуваасан цаасаа хуйлагч багажиндаа хийж, хуйлж дуусмагцаа удаан барилгүйгээр шууд дугуй хэмжээст шугамандаа хийнэ. Би 3 гэсэн дугаартай хэмжээст нь хийсэн.
Хийсний дараагаар хуйлмал маань аяандаа өөрөө задрана. Тэр үед нь гаргаж аваад цавуугаа түрхээд нэг талаас нь чимхэж дусал хэлбэртэй болгоно.
Cанамж: Цавуугаа шүдний чигчлүүр ашиглан маш бага хэмжээтэй түрхээрэй. Түрхсний дараа 5 секунд хэртэй бариарай.
Энэ мэтчилэн цэцгийн дэлбээнүүдээ хийж дуусаад хооронд нь наана. Хэвийг нь алдагдуулахгүйн үүднээс лак (DuraClear Ultra Matte)-аа 3 давхарлан түрхсэн.
Одоо бэлэн болсон цэцгээ туузтайгаа холбоё. Цэцэгний 2 дээд талаас холбогч цагиргаа хийнэ. Туузнаасаа мөн холбогч цагиргаа хийнэ. Ингээд тууз, цэцэг хоёроо холбоно.
Зөвлөмж: Цагирганыхаа амыг бахиар нээхдээ амыг нь ангайлгах биш, хажуу тийш нь зөрүүлж нээгээрэй. Ингэснээр буцаагаад хавчихад цагирагны хэлбэр алдагдагдахгүй.
Эцэст нь туузандаа түгжээ хийгээд choker хүзүүний зүүлт маань бэлэн боллоо.
За та ч гэсэн намайг дагаад урлаад үзээрэй, танд таалагдах болно гэдэгт итгэлтэй байна.
Амжилт хүсье.
Дараагийн урлалаараа эргэн уулзталаа түр баяртай.
Бүх сэтгэгдлийг үзэх